काठमाडौँ – प्रिमियर लिगको साबिक विजेता आर्सनल यस सिजनकै पहिलो हार बेहोर्दै ब्राइटनसँग ३-० ले स्तब्ध बनेको छ। घरेलु टोली ब्राइटनको मैदानमा अप्रत्यासित र कमजोर प्रदर्शन गरेपछि आर्सनलले जारी सिजनको पहिलो पराजय भोगेको हो।
गत सिजन २२ वर्षको लामो पर्खाइ अन्त्य गर्दै उपाधि जितेको आर्सनललाई यस सिजन पनि उपाधिको मुख्य दाबेदार मानिएको छ। जारी सिजनका सुरुआती सातामा सबै प्रतियोगितामा लगातार सात खेल जित्दै आर्सनलले आफ्नो बलियो उपस्थिति साबित गरेको थियो।
- Advertisement -
दक्षिण तटीय क्षेत्रको भ्रमणमा निस्किएको आर्सनलविरुद्ध संगठित र रणनीति अनुसार खेलेको ब्राइटनले उत्कृष्ट ३-० को जित निकाल्यो। यो जितसँगै ब्राइटन प्रिमियर लिग तालिकाको तेस्रो स्थानमा उक्लिएको छ।
गत सिजनभर लिगका कुनै पनि खेलमा एक गोलभन्दा बढीको अन्तरले नहारेको आर्सनलका लागि यो पराजय सन् १९८९ यता साबिक विजेताको रूपमा बेहोरेको सबैभन्दा ठूलो हार हो। आर्सनलका मुख्य प्रशिक्षक मिकेल आर्टेटाले ब्राइटन जितको हकदार रहेको स्वीकार गर्दै यो हारले अन्तर्राष्ट्रिय ब्रेकअघि टोलीलाई “ठूलो पाठ” सिकाएको बताएका छन्। आर्सनलको यो फराकिलो हारले उपाधि होडमा रहेका अन्य प्रतिस्पर्धी टोलीहरूलाई नयाँ उत्साह दिएको छ।
यस्तै, ब्राजिलियन फरवार्ड राफिन्हाको लगातार दोस्रो खेलमा उत्कृष्ट ह्याट्रिक मद्दतमा शीर्ष स्थानको बार्सिलोनाले स्पेनिस ला लिगामा सेभियामाथि सहज जित दर्ता गरेको छ। रामोन सान्चेज-पिज्जुआन स्टेडियममा सम्पन्न खेलमा सेभियालाई पराजित गर्दै बार्सिलोनाले लिगको शीर्ष स्थानमा आफ्नो अग्रता अझ फराकिलो बनाएको हो।
यस सिजन उत्कृष्ट लयमा रहेका २९ वर्षीय राफिन्हाको यो जितसँगै सबै प्रतियोगिताहरूमा गरी गोल सङ्ख्या १४ पुगेको छ। यसअघि गत बुधबार रेसिङ सान्टान्डरविरुद्ध ७-२ को जित निकाल्दा पनि उनले ह्याट्रिक प्रहार गरेका थिए।
खेलमा सुरुआती अग्रता भने घरेलु टोली सेभियाले लिएको थियो। १९औँ मिनेटमा फेलिक्स कोरेयाको क्रसमा युसुफ फोफानाले हेडमार्फत गोल गर्दै सेभियालाई १-० को अग्रता दिलाएका थिए। तर, त्यसको तीन मिनेट बित्न नपाउँदै राफिन्हाले उत्कृष्ट गोल गर्दै बार्सिलोनालाई १-१ को बराबरीमा ल्याए।
दोस्रो हाफमा युवा स्टार लामिन यमाल र राफिन्हाको जोडी चम्कियो। ५२औँ मिनेटमा यमालको सुन्दर क्रसमा राफिन्हाले हेडमार्फत टोलीको दोस्रो गोल गरे। त्यसपछि ६९औँ मिनेटमा यमालकै थ्रु-पासमा राफिन्हाले सेभियाका गोलकिपर ओडिसास भ्लाचोडिमोसलाई बिट गर्दै उत्कृष्ट चिप गोलमार्फत आफ्नो ह्याट्रिक पूरा गरे।
यो जितसँगै बार्सिलोनाले लिगमा लगातार सातौँ र सबै प्रतियोगितामा गरी आठौँ जित दर्ता गरेको छ। तालिकाको शीर्ष स्थानमा रहेको बार्सिलोनाको ८ खेलबाट २१ अङ्क पुगेको छ। जुन एक खेल कम खेलेका दोस्रो स्थानको रियल मड्रिड र तेस्रो स्थानको रियल बेटिसभन्दा ६ अङ्क बढी हो। पराजित सेभिया १३ अङ्कसहित तालिकाको पाँचौँ स्थानमा यथावत् छ।
प्रतिक्रिया दिनुहोस्