काठमाडौं – पत्रकार किशोर श्रेष्ठलाई पुनः पक्राउ गर्ने प्रहरीको प्रयासमा तत्कालका लागि अदालतले रोक लगाएको छ । ललितपुर जिल्ला अदालतले श्रेष्ठलाई पक्राउ गर्न अनुमति दिन अस्वीकार गरेको हो ।
उपसभामुख रुवीकुमारी ठाकुरले आफ्नो चरित्र हत्या गरेको भन्दै सोमबार प्रहरीमा जाहेरी दर्ता गराएकी थिइन् । सोही जाहेरीलाई आधार बनाएर ललितपुर प्रहरीले श्रेष्ठलाई नियन्त्रणमा लिन अदालतसँग अनुमति मागेको थियो ।
- Advertisement -
तर, अदालतले प्रहरीको मागअनुसार पक्राउ अनुमति नदिएपछि श्रेष्ठलाई तत्काल पक्राउ गर्ने बाटो खुलेन ।
श्रेष्ठले पनि आफूविरुद्ध हुन सक्ने थप धरपकड रोक्न अदालत गएका छन् । उनले मंगलबार उच्च अदालत पाटनमा निषेधाज्ञाको निवेदन दर्ता गर्दै आफूलाई पक्राउ नगर्न तथा आफ्ना सञ्चार उपकरणसमेत बरामद नगर्न आदेश माग गरेका छन् ।
फरक आरोपमा पक्राउ परेका श्रेष्ठ सोमबार मात्र सर्वोच्च अदालतको परमादेशपछि रिहा भएका थिए । सर्वोच्चको आदेशबाट रिहा भएकै दिन उनीविरुद्ध उपसभामुख ठाकुरले जाहेरी दिएकी थिइन् ।
प्रतिक्रिया दिनुहोस्