अमेरिकामा जनस्वास्थ्य सङ्कट घोषणा

गोरक्ष पोस्ट
गोरक्ष पोस्ट २० श्रावण २०७९, शुक्रबार
1 Min Read
Aa

काठमाडौँ -अमेरिकामा मंकीपक्सका संक्रमित बढेपछि जनस्वास्थ्य सङ्कटकालको घोषणा गरिएको छ। अमेरिकी सरकारले बिहीबार सङ्कटकालको घोषणा गरेको हो। स्वास्थ्य तथा मानवीय सेवा विभागका तर्फबाट बिहीबार आयोजना गरिएको पत्रकार सम्मेलनमा अमेरिकामा मङ्कीपक्सको अवस्था दिन प्रतिदिन बढ्दै गएपछि सङ्कटकाल घोषणा गरिएको बताइएको थियो।

विश्व स्वास्थ्य सङ्गठनले मङ्कीपक्सलाई विश्वव्यापी समस्याका रुपमा घोषणा गरेको एक हप्तापछि अमेरिकाले पनि आफ्नो देशमा जनस्वास्थ्य सङ्कटकाल घोषणा गरेको हो। अमेरिकामा बिहीबारसम्ममा ६ हजार ६ सय जनामा यो सङ्क्रमण देखिएको बताइएको थियो। पत्रकार सम्मेलनमा दिइएको जानकारीअनुसार विश्वमा हाल देखा परेको मङ्कीपक्सको सङ्क्रमणमध्ये अमेरिकामा मात्र २५ प्रतिशत पाइएको हो।

विश्वका कैयौँ देशमा मङ्कीपक्सको सङ्क्रमण देखिएको छ। विश्वमा हाल २५ हजार ८ सय जनामा यो सङ्क्रमण पाइएको बताइएको छ। अहिले पनि विश्वका कतिपय देशहरुमा यसको सङ्क्रमण दिन प्रतिदिन बढ्दै गएका समाचारहरु आइरहेका छन्। अमेरिकाका न्युयोर्क, क्यालिफोर्निया र इलिनोइसमा यो सङ्क्रमणका बढी सङ्क्रमितहरु पाइएका बताइएको छ।

प्रतिक्रिया दिनुहोस्