काठमाडौँ उपत्यकामा अपराह्नदेखि मेघगर्जनसहित थप वर्षाको सम्भावना, सतर्क रहन आग्रह

काठमाडौँ – जल तथा मौसम विज्ञान विभाग, मौसम पूर्वानुमान महाशाखाले काठमाडौँ उपत्यकामा आज थप वर्षाको सम्भावना रहेको जनाएको छ। मनसुनी वायुको देशव्यापी प्रभावका कारण उपत्यकाको मौसममा लगातार परिवर्तन भइरहेको मौसमविद्हरूले बताएका छन्।

मौसम पूर्वानुमान महाशाखाका अनुसार आज काठमाडौँ उपत्यकाको आकाश साधारणतया बदली रहनेछ। विशेष गरी अपराह्न तथा साँझपख मेघगर्जन र चट्याङसहित हल्कादेखि मध्यम वर्षाको बलियो सम्भावना रहेको छ।

- Advertisement -

महाशाखाका अनुसार बागमती प्रदेशका पहाडी भूभागका एक-दुई स्थानमा भारी वर्षाको समेत जोखिम रहेको छ। वर्षाका कारण काठमाडौँका नदी तथा खोलाहरूमा जलसतह बढ्न सक्ने र कमजोर भूभागमा पहिरो जान सक्ने भएकाले नदी किनार आसपास बस्ने र यात्रा गर्नेहरूलाई विशेष सतर्कता अपनाउन मौसमविद्हरूले आग्रह गरेका छन्।