काठमाडौँ – राष्ट्रिय स्वतन्त्र पार्टी (रास्वपा) का सभापति रवि लामिछानेले मुलुकमा निम्तिएको प्राकृतिक विपद्को सामना गर्न राजनीतिक दलहरूबीच साझा रणनीति बनाउने उद्देश्यले सर्वदलीय बैठक आह्वान गरेका छन्। बाढी, पहिरो र डुबानका कारण देशका विभिन्न भागमा जनधनको ठूलो क्षति भइरहेका बेला राजनीतिक तहबाट एकीकृत र प्रभावकारी पहलकदमी लिन यो बैठक बोलाइएको हो।
बुधबार बिहान ११ बजे सिंहदरबारस्थित रास्वपा संसदीय दलको कार्यालयमा बस्ने गरी तय भएको सो बैठकमा संसदमा प्रतिनिधित्व गर्ने प्रमुख राजनीतिक दलका शीर्ष नेताहरूलाई आमन्त्रण गरिएको छ। बैठकमा विपद् जोखिम न्यूनीकरण, उद्धार कार्य, राहत वितरण र क्षतिग्रस्त संरचनाहरूको दिगो पुनर्स्थापनाका लागि दलीय समन्वय कसरी बढाउने भन्ने विषयमा सरोकारवाला दलहरूबीच गहन छलफल हुनेछ।
- Advertisement -
लामो समयदेखि प्राकृतिक संकटको घडीमा सरकारी प्रयास चुस्त हुन नसकेको गुनासो जनस्तरबाट आइरहेका बेला सभापति लामिछानेले दलीय सहकार्यको खाका कोर्न यो अग्रसरता लिएका छन्। बैठकमा विपद् व्यवस्थापनलाई थप व्यवस्थित बनाउन एउटा उच्चस्तरीय राजनीतिक संयन्त्र वा सर्वदलीय विशेष समिति गठन गर्ने विषयमा समेत दलहरूबीच साझा धारणा बनाउने प्रयास गरिने रास्वपा स्रोतले जनाएको छ।
प्रतिक्रिया दिनुहोस्