त्रिशूली–३ ‘ए’ को सुरुङ खोल्न बाक्लो स्ल्याब फुटाउने तयारी, ४२ जनाको जीवितै उद्धार गर्न रातभर युद्धस्तरमा प्रयास

काठमाडौँ – बाढी र पहिरोका कारण नुवाकोटस्थित माथिल्लो त्रिशूली–३ ‘ए’ जलविद्युत् आयोजनाको सुरुङ (टनेल) भित्र फसेका ४० देखि ४२ जना कर्मचारी तथा प्राविधिकहरूको जीवितै उद्धार गर्न रातभर युद्धस्तरमा उत्खनन कार्य जारी राखिएको छ। सुरुङको मुख्य भाग (क्राउन हेड) फेला परेपछि उद्धार टोलीले भित्र पस्ने प्रयास तीव्र बनाएको हो।

आइतबार दिउँसो उद्धार टोलीले सुरुङको माथिल्लो भागमा २ फिट चौडाइ र ३ फिट लम्बाइको प्वाल बनाउन सफल भएको थियो। उक्त प्वालबाट डोरीको सहायताले उद्धारकर्मीहरू सुरुङको तल्लो भागसम्म पुगेर बारम्बार आवाज दिँदा पनि भित्रबाट कुनै प्रतिक्रिया आएको छैन।

अक्सिजन प्रवाह र सुरुङ विज्ञको कमाण्ड
सुरुङभित्र फसेकाहरूको जीवनरक्षाका लागि टोलीले यसअघि नै ५ वटा विशेष प्वाल (ड्रिल) बनाएर अक्सिजन र हावा पठाउने व्यवस्था मिलाइसकेको छ। उद्धार कार्यलाई प्राविधिक रूपमा चुस्त बनाउन प्रतिनिधिसभा सदस्य एवं सुरुङ विज्ञ श्रीराम न्यौपाने आफैँ कार्यस्थलमा खटिएर गरिरहेका छन् ।

५ दिनदेखि सुरुङभित्र फसेका कर्मचारीहरूको अवस्थालाई लिएर आफन्तजन चिन्तित बनेका छन्। सरकारले नागरिकको जीवनरक्षालाई उच्च प्राथमिकतामा राख्दै नेपाली सेना, सशस्त्र प्रहरी र नेपाल प्रहरीका ९० जनाको संयुक्त विशेषज्ञ टोली परिचालन गरी उद्धारमा कुनै कसर बाँकी नराख्ने प्रतिबद्धता जनाएको छ।