काठमाडौँ – अस्ट्रेलियामा जारी टप एन्ड टी-२० सिरिजको आफ्नो अन्तिम खेलमा नेपाल ‘ए’ टोली भिक्टोरिया सिए-११ (Victoria CA XI) सँग रोमाञ्चक १ विकेटले पराजित भएको छ। डार्विनस्थित मरारा क्रिकेट मैदानमा शनिबार भएको खेलमा नेपालले प्रस्तुत गरेको १४३ रनको चुनौतीपूर्ण लक्ष्य भिक्टोरियाले २० ओभरको अन्तिम बलमा ९ विकेट गुमाएर पूरा गर्यो।
टस जितेर पहिले ब्याटिङ रोजेको नेपाल ‘ए’ ले निर्धारित २० ओभरमा ६ विकेट गुमाएर १४२ रनको योगफल तयार पारेको थियो। नेपालका लागि ओपनिङ ब्याटर कुशल भुर्तेलले विष्फोटक ब्याटिङ गर्दै ५५ बलमा ६ चौका र ५ छक्काको मद्दतले अविजित ९० रनको उत्कृष्ट इनिङ खेले। तर, अन्य ब्याटर चल्न नसक्दा नेपाल ठूलो स्कोर खडा गर्नबाट चुक्यो। दीपक डुम्रेले १६ रन जोड्नु बाहेक अन्य कुनै पनि नेपाली ब्याटरले दोहोरो अंकमा रन छुन सकेनन्।
- Advertisement -
अन्तिम ओभरको थ्रिलर र भिक्टोरियाको जित
१४३ रनको लक्ष्य पछ्याएको भिक्टोरियाका लागि टम रोजर्सले ३६ रन र ह्यारी होएकस्ट्राले अविजित ३५ रनको महत्त्वपूर्ण इनिङ खेले। खेल अन्तिम ओभरको अन्तिम बलसम्म पुग्दा निकै रोमाञ्चक बनेको थियो। अन्तिम बलमा जितका लागि रन आवश्यक हुँदा भिक्टोरियाले विकेट गुमाए पनि लक्ष्य पूरा गर्न सफल भयो। नेपालका लागि बलिङतर्फ युवराज खत्री र कुशल भुर्तेलले घातक बलिङ गर्दै ३–३ विकेट तथा आकाश चन्दले १ विकेट लिए पनि टोलीलाई जित दिलाउन सकेनन्।
नेपाल प्रतियोगिताबाट बाहिरियो
यो हारसँगै नेपाल ‘ए’ को टप एन्ड टी-२० सिरिजको यात्रा समाप्त भएको छ। नेपालले प्रतियोगिताका ६ खेलमध्ये २ खेलमा जित र ४ खेलमा हार ब्यहोर्दै कुल ४ अंकका साथ बाहिरिएको हो। यसअघि नेपालले बलिया टोलीहरू होबर्ट हुरिक्यान्स र अस्ट्रेलिया क्यापिटल टेरिटोरी (ACT) लाई पराजित गर्दै उत्कृष्ट सुरुवात गरेको थियो।
प्रतिक्रिया दिनुहोस्