काठमाडौँ – बाढी र लेदोका कारण विगत दुई दिनदेखि ठप्प रहेको पृथ्वी राजमार्ग शुक्रबार रातिदेखि एकतर्फी रूपमा सञ्चालनमा आएको छ।
रसुवाको भोटेकोसी नदीमा आएको बाढीले धादिङको विभिन्न खण्डहरूमा भारी लेदो र गेग्रान थुपारेपछि काठमाडौँ उपत्यका जोड्ने यो मुख्य राजमार्ग पूर्ण रूपमा अवरुद्ध भएको थियो। सडक विभाग र सुरक्षा निकायको निरन्तर प्रयासपछि राजमार्गका विभिन्न स्थानमा थुप्रिएको लेदो पन्छाएर एकतर्फी यातायात खुलाइएको हो।
- Advertisement -
अलपत्र सवारीलाई प्राथमिकता
सडक डिभिजन कार्यालय र ट्राफिक प्रहरीले राजमार्गमा दुई दिनदेखि अलपत्र अवस्थामा रहेका मालवाहक ट्रक र यात्रुवाहक सवारीसाधनहरूलाई पहिलो प्राथमिकता दिँदै गन्तव्यतर्फ पठाउन सुरु गरेका छन्।
मलेखु नजिकैको पोखरी, बाँगे, गलौदी र जरिखेत क्षेत्रको लेदो हटाइए पनि बैरेनी क्षेत्रमा अझै पूर्ण रूपमा लेदो पन्छाउन बाँकी रहेको छ। बैरेनी खण्डको करिब १ हजार ३०० मिटर सडकमा बाक्लो लेदो जमेकाले दुईतर्फी बाटो खुलाउन थप केही समय लाग्ने देखिएको छ।
सावधानी अपनाउन ट्राफिक प्रहरीको आग्रह
राजमार्ग एकतर्फी मात्र खुला भएकाले बैरेनी र गल्छी क्षेत्रमा अत्यधिक सवारी जाम हुने सम्भावना छ। सडक पूर्ण रूपमा सफा भई दुईतर्फी यातायात सञ्चालन नभएसम्म चालकहरूलाई अत्यन्तै सावधानी अपनाउन र खटिएका ट्राफिक सुरक्षाकर्मीहरूको निर्देशन पूर्ण रूपमा पालना गर्न जिल्ला ट्राफिक प्रहरी कार्यालय धादिङले अनुरोध गरेको छ।
प्रतिक्रिया दिनुहोस्