काठमाडौं – सेवानिवृत्त हुन लागेका मुख्यसचिव सुमनराज अर्यालको बिदाइ तथा नवनियुक्त मुख्यसचिव गोविन्दबहादुर कार्कीको स्वागत गरिएको छ।
प्रधानमन्त्री तथा मन्त्रिपरिषद्को कार्यालयमा आयोजित कार्यक्रममा निवर्तमान मुख्यसचिव अर्यालले लामो समयको निजामती सेवापछि अवकाश लिन लागेको उल्लेख गर्दै राज्य र जनताको सेवामा योगदान गर्ने अवसर पाएकोमा सन्तुष्टि व्यक्त गरे।
- Advertisement -
उनले जेन जेड आन्दोलनपछिको संवेदनशील परिस्थितिमा मुख्यसचिवको जिम्मेवारी सम्हाल्नु चुनौतीपूर्ण भए पनि राजनीतिक नेतृत्व, प्रधानमन्त्रीका सल्लाहकार, संवैधानिक निकाय, निजामती कर्मचारी, सुरक्षा निकाय तथा विभिन्न सार्वजनिक संस्थाको सहयोगका कारण जिम्मेवारी प्रभावकारी रूपमा पूरा गर्न सकेको बताए।
प्रधानमन्त्रीका राजनीतिक सल्लाहकार असीम शाहले सरकार परिवर्तनशील भए पनि कर्मचारीतन्त्र स्थायी संयन्त्रका रूपमा रहने भएकाले राज्य सञ्चालनमा निजामती प्रशासनको भूमिका महत्त्वपूर्ण हुने बताए। उनले सरकार र प्रशासनबीच सहकार्य आवश्यक रहेको उल्लेख गर्दै कर्मचारीको मूल्यांकन कार्यसम्पादनका आधारमा हुने धारणा राखे।
शाहले सार्वजनिक सेवामा योगदान गर्ने व्यक्तिको भूमिका अवकाशपछि पनि कायम रहने भन्दै निवर्तमान मुख्यसचिव अर्यालको अनुभव र ज्ञानलाई आगामी दिनमा पनि उपयोग गर्न सकिने बताए। उनले मुख्यसचिव कार्कीको नेतृत्वमा निजामती प्रशासन थप प्रभावकारी र सक्षम बन्ने विश्वास व्यक्त गरे।
नवनियुक्त मुख्यसचिव कार्कीले आफ्नो जिम्मेवारी इमानदारी, निष्पक्षता र जवाफदेहिताका साथ निर्वाह गर्ने प्रतिबद्धता व्यक्त गरे। उनले निजामती सेवा सुधारका लागि सरकारले अघि सारेका नीतिहरूलाई सार्वजनिक प्रशासनको हितमा प्रभावकारी रूपमा कार्यान्वयन गर्ने बताए।
कार्यक्रममा प्रधानमन्त्रीको तर्फबाट राजनीतिक सल्लाहकार शाहले निवर्तमान मुख्यसचिव अर्याललाई कदर पत्र प्रदान गरेका थिए। प्रधानमन्त्री तथा मन्त्रिपरिषद्को कार्यालयका कर्मचारी र सचिवहरूले अर्यालको नेतृत्व, योगदान र सेवाप्रति धन्यवाद व्यक्त गर्दै नवनियुक्त मुख्यसचिव कार्कीलाई सफल कार्यकालको शुभकामना दिएका थिए।
प्रतिक्रिया दिनुहोस्