एनपीएलको हिसाब-किताबलाई लिएर नियोजित मिडियाबाजी भएको सचिव पारस खड्काको आरोप

विराटनगर – नेपाल क्रिकेट एशोसिएसनका सचिव पारस खड्काले क्यान र नेपाल प्रिमियर लिग एनपीएलको हिसाब–किताबलाई लिएर नियोजित मिडियाबाजी गरिएको बताएका छन् ।

विराटनगरमा भएको क्यानको साधारण सभामा सहभागी हुन आएका उनले अख्तियारमा बेनामी उजुरी गर्ने र भ्रम फैलाउने प्रवृत्ति हाबी भएको टिप्पणी गरे ।

- Advertisement -

सञ्चारकर्मीसँग कुरा गर्दै खड्काले भने, ‘हिसाब–किताब चाहने सदस्यहरूलाई कार्यालयमै आएर कागजात हेर्न आह्वान गरिएको छ । तर संस्थाका गोप्य डकुमेन्टहरू इमेलमार्फत जथाभाबी पठाउने प्रावधान छैन ।’

दुई दिनसम्म सञ्चालन हुने साधारणसभाको उद्घाटन कोशी प्रदेशका मुख्यमन्त्री हिक्मतकुमार कार्कीले गरेका थिए । साधारणसभामा क्रिकेटसँग सम्बन्धित विभिन्न समसामयिक विषयमा छलफल हुने जनाइएको छ ।

पछिल्लो १० महिनादेखि नवीकरण नभई अन्तर्राष्ट्रिय प्रतियोगितामा सहभागिता जनाएको विषयले साधारणसभामा प्रमुख एजेन्डाको रूपमा प्रवेश पाउने अपेक्षा गरिएको छ । क्यानले पछिल्लो पटक २०८१ असोजमा साधारणसभा सम्पन्न गरेको थियो ।