बैशाख १२ गते शुक्रबारको तपाईको दैनिक राशिफल

आज मिति वि.सं २०८२ बैशाख १२ गते शुक्रबार ई.सं २०२५ अप्रिल २५ नेपाल सम्बत ११४५ चिल्लागा द्वादशी, सिद्धार्थि नाम संवत्सर सूर्य उत्तरायनं, वसन्त ऋतु, वैशाख कृष्ण द्वादशी, चन्द्रमा मीन राशिमा, पूर्वभाद्र नक्षत्र, एन्द्र योग, गर करण । आज नेपालमा सूर्याेदय बिहान ५ बजेर ३२ मिनेटमा झुल्किएको घाम साँझ ०६ बजेर ३४ मिनेटमा अस्ताउने छ ।

मेष राशि (चु, चे, चो, ला, लि, लु, ले, लो, अ): आजको दिन सानातिना काममा महत्वपूर्ण समय बित्ने देखिन्छ । सहयोगीहरूको साथ दिए पनि काम पूरा नहुन सक्छ । समयको ब्यर्थ नाश हुने र व्यर्थको खर्च बढ्ने योग रहेकोले सजगता अपनाउनुहोला । तथापि, मिठो भोजन प्राप्त हुने र यात्रागत कार्यमा सफलता प्राप्त हुनेछ । आमोदप्रमोदको भाव वृद्धि हुनेछ ।

- Advertisement -

बृष राशि (इ, उ, ए, ओ, बा, बि, बु, बे, बो): अवसरको खोजीमा केही दौडधूप गर्नुपर्ला । आजको दिन अनावश्यक यात्राको योग छ । सबल स्वास्थ्यका लागि आहारविहारमा विशेष सतर्क रहनु उचित हुनेछ । सोचेकोे काम समयमै सम्पन्न गर्न कठोर मिहिनेत पर्ने देखिन्छ । मित्रजनको साथ-सहयोगले सुखको अनुभव हुनेछ । धर्मकर्ममा आकर्षण बढ्नेछ । परिवारिक सुख र उत्साह बढ्नेछ ।

मीथुन राशि (का, कि, कु, घ, ङ, छ, के, को, ह): सामाजिक कार्य तथा परोपकारमा मन जाने समय छ । पढाइलेखाइमा सफलता पाउने तथा धार्मिक कार्यमा रुचि बढ्ने देखिन्छ । मातापितासंगको भेटघाटले मनमा हर्ष छाउला । आज स्वास्थ्यमा केही कमजोरी अनुभूति भएपनि नियमित कार्यमा दखल पर्नेछैन । खर्च भन्दा कमाई नै बढी हुने योग छ । महत्वपूर्ण कार्यमा अरुको भर नपर्नु उचित हुनेछ । पराक्रम वृद्धि भइ शत्रुपक्ष परास्त हुनेछ ।

कर्कट राशि (हि, हु, हे, हो, डा, डि, डु, डे, डो): भाग्योदयको समय छ । पारिवारिक सुख मिल्नेछ भने ब्यापार-व्यवसायमा पनि राम्रै फाइदा होला । सुख-दुःखमा साथ दिनेहरू प्रशस्तै भेटिनेछन् । धनार्जनको योग छ । विपरितलिङ्गीको साथ-सहयोग एवम् हौसलाले मन रमाउला । मनोरञ्जनात्मक क्रियाकलापमा आकर्षण बढ्नेछ । साझेदारीको काम बन्नेछ ।

सिंह राशि (मा, मि, मु, मे, मो, टा, टि, टु, टे): आजको दिन मिश्रित फलदायी रहला । मनमा उदासिनता बढ्नुका साथै काममा अवरोध सिर्जना गर्नेहरु सक्रिय हुनेछन्, विश्वास गरेकाले धोका दिन सम्भावना छ, सजगता अपनाएर व्यवहार गर्नु उचित हुनेछ । बिहान काम बन्नेछ भने दिनको पछिल्लो प्रहर सामान्य तनाव वृद्धि हुनसक्छ । इष्टमित्रहरुसँग असमझदारी बढ्ने योग रहेकोले बोली र व्यवहारमा संयमता अपनाउनुहोला । महत्वपूर्ण कार्ययोजना आज थाती राख्नु हितकर हुनेछ । प्रतिकुलताका बाबजुद प्रेमभाव बढ्नेछ । आरोग्यता रहनेछ ।

कन्या राशि (टो, प, पि, पु, ष, ण, ठ, पे, पो): पेशागत रुपमा समस्या देखिन सक्ने तथा नोकरीमा झमेला ब्यहोर्नु पर्ने समय भएपनि बुद्धि-विवेकले बाधा पन्छाउने सफलता मिल्नेछ । स्वास्थ्यका दृष्टिकोणले राम्रो समय छ । आर्थिक लाभ हुनेछ भने मान-सम्मान पनि पाउन सकिन्छ । रसरागसम्बन्धी क्रियाकलापमा आकर्षण बढ्नेछ । यात्रा सुखद रहला । पारिवारिक सुखशान्ति बढ्नुको साथै नियमित कार्यमा सफलता नै मिल्ने देखिन्छ ।

तुला राशि (र, रि, रु, रे, रो, ता, ति, तु, ते): कार्यगति बढ्नेछ भने काम बन्नाले मन रमाृउने समय छ । मित्रजनको सहयोग र बुद्धिको उपयोगले लक्ष्य पहिल्याउन सकिएला । धन आर्जनको योग छ । नियमित कर्मबाट फलिफाप हुने देखिन्छ । विशेषतः पशुधनबाट राम्रो फाइदा हुने देखिन्छ । काम बन्नाले सुखको अनुभव होला । आरोग्यबल बढ्नेछ ।

बृश्चिक राशि (तो, ना, नि, नु, ने, नो, या, यि, यु): व्यस्तता बढे पनि नसोचेको काम बन्ने समय छ । प्रियजनसँगको भेटघाटले आनन्द प्रदान गर्ला । महत्वपूर्णकाम बन्नाले सुखको अनुभव हुनेछ । अनेक किसिमका फाइदा हुने योग छ । आफन्तजनको साथ-सहयोग प्राप्त हुनेछ । पराक्रम वृद्धि होला । आरोग्यता रहनेछ ।

धनु राशि (ये, यो, भ, भि, भु, ध, फा, ढ, भे): विभिन्न कार्यको एकसाथ चपेटमा पर्नाले मनमा चिडचिडापन पैदा हुन सक्छ । अनावश्यक झमेलामा पर्ने योग छ । आजको दिन यात्राको क्रममा सावधान रहनुहोला । सबल स्वास्थ्यका लागि खानामा सचेत रहनुपर्ने दिन छ । प्रतिकुलताका बाबजुद परिवारिक सुख वृद्धि हुनेछ । प्रेमभाव वृद्धिका साथै मिष्ठान्न भोजनको अवसर जुर्ने देखिन्छ ।

मकर राशि (भो, ज, जि, खि, खु, खे, खो, गा, गि): बोली र व्यवहारले धेरैलाई आकर्षण गर्ने समय छ । अप्ठ्यारोमा साथ दिनेहरू भेटिनेछन् भने रमाइलो खबर सुन्न पाइनेछ । परोपकारका काममा मन जाने देखिन्छ । आरोग्यता एवम् सुख वृद्धि हुनेछ । शत्रुपक्ष परास्त हुनेछ । खेलकूद, भ्रमण जस्ता कार्यमा आकर्षण बढ्नेछ । यात्रागत कार्य सफल रहनेछ ।

कुम्भ राशि (गु, गे, गो, सा, सि, सु, से, सो, द): आजको दिन विभिन्न दृष्टिले शुभ र सार्थक रहला । आयआर्जन हुने समय छ । मनोरञ्जनात्मक यात्राको सम्भावना छ । आश मारेको पैसा उठेर मनमा हर्ष छाउने योग छ । अनौठो तरिकाले कमाइ भइ मन खुशी बन्ने देखिन्छ । मिठो भोजन प्राप्त हुनेछ । आर्थिक विकाससित सम्बन्धित कार्यमा विशेष सफलता मिल्नेछ ।

मिन राशि (दि, दु, थ, झ, ञ, दे, दो, च, चि): सुख र दुःखको मिश्रित अनुभूति हुने दिन छ । घरमा पाहुना आगमन हुनसक्छ । धनलाभ हुनसक्ने र रमाइलो यात्राको पनि योग रहेको छ । तथापि, टाढाको यात्रा गर्ने योजनामा हुनुहुन्छ भने केही दिनका लागि स्थगित गर्नु उचित हुनेछ । कर्मबल बढ्नेछ, आफन्तको साथ मिल्नेछ ।

राशिफलमा जे जस्तो उल्लेख भएपनि तपाईको आजको दिन सुखद रहोस्