काठमाण्डौ :
नेपाली कांग्रेसका नेता प्रकाशमान सिंह र विवेकशील साझा पार्टीका पूर्व अध्यक्ष रवीन्द्र मिश्र वीच जुहारी चलेको छ । दन्तबजानमा दुवै अब्बल देखिएका छन् ।
राप्रपा प्रवेशको लागि हरियो झण्डा कुरेर बसेका रवीन्द्र मिश्रलाई, “आफ्नो नेतृत्वमा स्थापना भएको दललाई दुई वर्ष टिकाउन नसक्नेले के काम गर्लान” भन्दै प्रकाशमान सिंहले हिजो व्यंग्य गरेका थिए ।
कांग्रेस नेता सिंहको व्यंग्यको मिश्रले ठाडो प्रतिवाद गरेका छन् । मिश्रले सामाजिक सञ्जालमा लेख्दै स्थानीय चुनावमा नराम्रो नतिजा आएपछि आफूले अध्यक्ष पदबाट राजीनामा दिएको भन्दै सिंहलाई सोधेका छन्, “तपाईँले चाहिँ राजनीतिबाटै राजीनामा दिने कि ?”
मिश्रले प्रश्नको बर्षातनै गरेका छन् । मिश्रले प्रश्न गरेका छन् – “गत महाधिवेशनमा तपाईंले आफन्तलाई लाभ हुन्छ भनेर अन्तिम घडीमा बेइमानी गर्दा तपाईंको पार्टीमा नयाँ नेतृत्व आउन नसकेको होइन ?’”जनताको नजरमा पनि प्रकासमान माथि यो गम्भीर नैतिक प्रश्न हो ।
त्यस्तै संसद चलेको कुल कति दिन उपस्थित हुनुभयो ? अनुपस्थित भएका दिनको भत्ता लिनुभयो कि भएन ? पूर्वाधार विकास, सम्पदा संरक्षण लगायतका विषयमा के बोल्नुभयो, के गर्नुभयो ? जस्ता प्रश्न मिश्रले गरेका छन् ।
निर्वाचन घोषणा भएपछि कांग्रेस नेता सिंह र राप्रपा प्रवेशको लागि हरियो झण्डा कुरेर बसेका रवीन्द्र मिश्र वीचको दन्तबजान बाक्लिएको छ । यस अघि मिश्र , कांग्रेस नेता सिंहसँग निर्वाचनमा पराजित भएका थिए ।
कांग्रेस नेता सिंह सँग प्रजातान्त्रिक आन्दोलनका योद्धा एवं कमाण्डर गणेशमान सिंहको विरासत रहेको छ । त्यस्तै रवीन्द्र मिश्रका बुबा मनुजबाबु मिश्र पञ्चायत समर्थक हुनुहुन्थ्यो । मनुजबाबु मिश्रले बहुदल घोषणा पश्चात मृत्युपर्यन्त आफूलाई स्वनजरवन्दमा राख्नुभएको थियो ।
राजनीतिमा दुवै परिवार वीचको अंतरद्वन्द अनुमान गर्न सकिन्छ ।
प्रतिक्रिया दिनुहोस्