काठमाडौं – नेपाल प्रिमियर लिग (एनपीएल) अन्तर्गत आज सम्पन्न खेलहरूमा लुम्बिनी लायन्स र विराटनगर किङ्सले महत्त्वपूर्ण नतिजा निकाल्दै प्रतियोगितालाई थप रोमान्चक मोडमा पुर्याएका छन्। कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको खेलमा पोखरा एभेन्जर्समाथि आठ विकेटको सानदार जित निकाल्दै लुम्बिनी लायन्स अङ्क तालिकाको शीर्ष स्थानमा उक्लिएको छ।
पोखराले दिएको लक्ष्यलाई लुम्बिनीका ब्याटरहरूले विष्फोटक ब्याटिङको मद्दतले मात्र दुई विकेट गुमाएर सहजै पूरा गरे। यो जितसँगै लुम्बिनीले प्रतियोगितामा आफ्नो अपराजित यात्रा कायम राख्दै शीर्ष स्थान सुरक्षित गरेको छ भने लगातार तेस्रो हार बेहोरेको पोखरा तालिकाको पुछारतिर धकेलिएको छ।
- Advertisement -
आजै भएको अर्को प्रतिस्पर्धात्मक खेलमा विराटनगर किङ्सले बलियो टोली जनकपुर बोल्ट्समाथि एक रोमाञ्चक जित दर्ता गरेको छ। विराटनगरको यो रोमाञ्चक जितको मुख्य आधार वेस्टइन्डिजका विश्वप्रसिद्ध अलराउन्डर आन्द्रे रसेलको सानदार प्रदर्शन बन्यो।
उनले धारिलो बलिङ गर्दै जनकपुरका प्रमुख ब्याटरहरूलाई पेभिलियन फर्काए भने चुनौतीपूर्ण लक्ष्य पछ्याउने क्रममा आक्रामक ब्याटिङ गर्दै टोलीलाई जितको ढोका खोले। जनकपुरको लगातार चौथो जित निकाल्ने योजनामा पूर्णविराम लगाउँदै विराटनगरले महत्त्वपूर्ण दुई अङ्क जोडेर अङ्क तालिकामा ठुलो फड्को मारेको छ।
यी दुवै खेलको नतिजाले एनपीएलको अङ्क तालिकामा व्यापक उलटफेर ल्याउँदै उपाधि होडको प्रतिस्पर्धालाई अझ कडा बनाएको छ।
प्रतिक्रिया दिनुहोस्