काठमाडौं – नेपाली कम्युनिस्ट पार्टी (नेकपा) का सह-संयोजक एवं पूर्वप्रधानमन्त्री माधवकुमार नेपालले देशको राष्ट्रिय हित र स्वाभिमानमा आँच पुग्ने कुनै पनि गतिविधि आफूहरूलाई स्वीकार्य नहुने र त्यस्तो अवस्थामा टुलुटुलु हेरेर नबस्ने चेतावनी दिएका छन्।
कात्तिक ७ गते शनिबारदेखि पार्टीले देशव्यापी रूपमा सुरु गरेको दुई महिने ‘राष्ट्रिय जागरण अभियान’ को भव्य उद्घाटन समारोहलाई सम्बोधन गर्दै उनले यस्तो धारणा राखेका हुन्।
- Advertisement -
आफ्नो सम्बोधनका क्रममा नेता नेपालले राष्ट्रियताको मुद्दालाई सबैभन्दा उच्च महत्त्व दिँदै राष्ट्रिय स्वाभिमानको रक्षा, संविधानको संरक्षण, र लोकतान्त्रिक गणतन्त्रको सुदृढीकरणका लागि यो अभियानमार्फत जनतामा व्यापक चेतना जगाइने स्पष्ट पारे।
उनले काम गर्ने क्रममा राजनीतिक दल र नेताहरूबाट कमी-कमजोरी हुन सक्ने कुरालाई आत्मसाथ गर्दै ती गल्तीहरूमा आत्तिनुको सट्टा गम्भीर समीक्षा र सुधार गर्दै अघि बढ्नुपर्नेमा जोड दिए।
विगत ३५ वर्षमा पुराना राजनीतिक दलहरूले देशका लागि केही पनि गरेनन् भनी बजारमा फैलाइएका नयाँ भाष्य र आरोपहरूलाई तथ्य र प्रमाणका आधारमा पुष्टि गर्न चुनौती दिँदै उनले नेपाली जनताको ठूलो त्याग, तपस्या र बलिदानबाट प्राप्त नागरिक उपलब्धिलाई संस्थागत गर्ने र वर्तमान संविधानको रक्षा गर्ने प्रमुख जिम्मेवारी कम्युनिस्ट पार्टीकै काँधमा रहेको दाबी समेत गरे।
प्रतिक्रिया दिनुहोस्