काठमाडौं – नेपाल प्रिमियर लिग (एनपीएल) अन्तर्गत सोमबार सम्पन्न खेलहरूमा सुदूरपश्चिम रोयल्सले आफ्नो विजयी यात्रा कायमै राखेको छ भने काठमाडौँ गुर्खाजले प्रतियोगितामा पहिलो जित दर्ता गरेको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको पहिलो खेलमा सुदूरपश्चिम रोयल्सले चितवन राइनोजलाई ५ विकेटले पराजित गर्दै लगातार दोस्रो जित दर्ता गर्यो।
टस हारेर पहिले ब्याटिङ गरेको चितवनले निर्धारित २० ओभरमा ६ विकेट गुमाएर १२९ रन बनाएको थियो। चितवनका लागि रवि बोपाराले सर्वाधिक ४९ रन बनाए भने सुदूरपश्चिमका स्कट कुगेलेइनले २ विकेट लिए। १३० रनको लक्ष्य पछ्याएको सुदूरपश्चिमले १६.४ ओभरमा ५ विकेट गुमाउँदै १३१ रन बनाएर लक्ष्य पूरा गर्यो। सुदूरपश्चिमको जितमा ब्रान्डन म्याकमुलनले २१ बलमा ४३ रनको आक्रामक इनिङ्स खेले।
- Advertisement -
सोमबार नै भएको दोस्रो खेलमा काठमाडौँ गुर्खाजले कर्णाली याक्सलाई पराजित गर्दै प्रतियोगितामा सुखद पुनरागमन गरेको छ। पहिलो खेलमा पराजय भोगेको काठमाडौँले कर्णालीविरुद्ध उत्कृष्ट प्रदर्शन गर्दै पहिलो जित दर्ता गर्न सफल भयो।
यो जितसँगै काठमाडौँले अंक तालिकामा आफ्नो खाता खोलेको छ भने कर्णालीले हारको सामना गर्नु परेको छ। दुवै खेलले एनपीएलको अंक तालिका र प्रतिस्पर्धालाई थप रोमान्चक बनाएको छ।
प्रतिक्रिया दिनुहोस्