प्रधानमन्त्री बालेनको चेतावनी-एक-दुई जना उम्किन्छु भनेर सपना नदेखे हुन्छ

काठमाडौं – प्रधानमन्त्री बालेन शाहले गलत काम गर्ने वा कानुनको दायराबाट उम्किने प्रयास गर्नेहरूलाई लक्षित गर्दै कडा चेतावनी दिएका छन्। आईतबार सामाजिक सञ्जाल फेसबुकमार्फत एक संक्षिप्त तर अर्थपूर्ण सन्देश जारी गर्दै उनले सही समय आएपछि कसैलाई पनि छुट नमिल्ने स्पष्ट पारेका हुन्।

फेसबुकमा स्ट्याटस लेख्दै प्रधानमन्त्री शाहले भनेका छन्, “सही समय आएपछि, सबैको गलत समय आउँछ। एक, दुई जना उम्किन्छु भनेर सपना नदेखे हुन्छ।”

- Advertisement -

प्रधानमन्त्री शाहको यो अभिव्यक्ति कुन विशिष्ट घटना वा व्यक्तिप्रति लक्षित छ भन्ने कुरा खुलाइएको छैन। यद्यपि, मुलुकमा पछिल्लो समय चलिरहेका विभिन्न भ्रष्टाचारसम्बन्धी छानबिन, प्रशासनिक कडाइ र राजनीतिक घटनाक्रमका बिच उनको यो भनाइ आएकाले यसलाई निकै अर्थपूर्ण रूपमा हेरिएको छ।

विशेष गरी, सरकारले सुशासन कायम गर्न र पुराना अनियमितताका फाइलहरू खोल्न चालेका कदमहरूप्रति केही पक्षबाट भइरहेको असन्तुष्टि वा ढिलासुस्तीलाई ध्यानमा राख्दै प्रधानमन्त्रीले यस्तो सन्देश दिएको आकलन गरिएको छ।

सामाजिक सञ्जालमा तीव्र गतिमा भाइरल भइरहेको प्रधानमन्त्रीको यो पोस्टलाई लिएर सर्वसाधारण र राजनीतिक वृत्तमा अनेकौँ चर्चा-परिचर्चा सुरु भएका छन्। अधिकांश समर्थकहरूले यसलाई सरकारको सुशासनप्रतिको प्रतिबद्धताका रूपमा व्याख्या गरेका छन्।