काठमाडौँ – विश्वविख्यात अमेरिकी प्रविधि कम्पनी एनभिडिया (NVIDIA) का संस्थापक तथा प्रमुख कार्यकारी अधिकृत (सीईओ) जेन्सेन हुआङले नेपालका बाढीपहिरो पीडितहरूको सहयोगार्थ १ करोड अमेरिकी डलर (करिब १ अर्ब ५० करोड रुपैयाँ) सहयोग प्रदान गरेका छन्। रसुवाको भोटेकोशी जलाधार क्षेत्रसहित नुवाकोट, धादिङ लगायतका जिल्लाहरूमा गएको विनाशकारी बाढी र पहिरोबाट प्रभावितहरूको राहत तथा पुनर्स्थापनाका लागि उनले प्रधानमन्त्री दैवी प्रकोप उद्धार कोषमा उक्त रकम जम्मा गरेका हुन्। बहुराष्ट्रिय कम्पनी वा कुनै विदेशी नागरिकबाट नेपालको विपद् व्यवस्थापनका लागि प्राप्त यो हालसम्मकै ठूलो व्यक्तिगत सहयोगमध्येको एक हो।
अर्थमन्त्री डा. स्वर्णिम वाग्लेले भिडियो सन्देशमार्फत एनभिडियाका सीईओ हुआङले गरेको यो ठूलो सहयोगको पुष्टि गर्दै नेपाल सरकार र नेपाली जनताका तर्फबाट हार्दिक धन्यवाद व्यक्त गरेका छन्। अर्थमन्त्री वाग्लेका अनुसार यो रकम बाढी प्रभावित क्षेत्रमा तत्काल खाद्यान्न, अस्थायी आवास, थातथलो गुमाएकाहरूको पुनर्स्थापना र क्षतिग्रस्त स्थानीय पूर्वाधारहरूको पुनर्निर्माणमा पारदर्शी ढंगले खर्च गरिनेछ। जेन्सेनको यो बलियो ऐक्यबद्धता र उदारताले विश्वका अन्य परोपकारी संस्थाहरू तथा दाताहरूलाई पनि नेपालको यस संकटपूर्ण घडीमा सहयोग गर्न प्रेरित गर्ने विश्वास सरकारले लिएको छ।
- Advertisement -
चीन र भारत लगायतका छिमेकी मुलुकहरू तथा विश्व बैंकजस्ता अन्तर्राष्ट्रिय संस्थाहरूले सहयोग गरिरहेका बेला विश्वकै अग्रणी एआई (AI) कम्पनीका प्रमुखबाट आएको यो सहयोगलाई अर्थपूर्ण रूपमा हेरिएको छ। भोटेकोशी बाढीका कारण नेपालको जलविद्युत् संरचना र अन्य क्षेत्रमा ठूलो धक्का पुगेको र पुनर्निर्माणका लागि अर्बौँको आवश्यकता परेको बेला यो रकमले ठूलो राहत पुग्ने बताइएको छ। यस ठूलो वैदेशिक सहयोग रकम थपिएसँगै प्रधानमन्त्री दैवी प्रकोप उद्धार कोषमा संकलित कुल रकम १० अर्ब रुपैयाँभन्दा बढी पुगिसकेको छ।
प्रतिक्रिया दिनुहोस्