काठमाडौँ – भोटेकोशी लगायतका क्षेत्रमा आएको विनाशकारी बाढी र पहिरोको सीधा असर नेपाल स्टक एक्सचेञ्ज (नेप्से) मा देखिएको छ। बाढीले जलविद्युत् आयोजना र भौतिक संरचनामा ठूलो क्षति पुर्याएपछि सोमबार बजारमा तीव्र गिरावट आएको हो। नेप्से परिसूचक ४३.८९ अंकले घटेर २५१३.४२ विन्दुमा झरेको छ।
विपत्तिका कारण भविष्यमा बीमा दाबी (Claims) अत्यधिक बढ्ने र कम्पनीहरूको नाफा घट्ने डरले लगानीकर्ताहरूमा ‘पेनिक सेलिङ’ (आत्तिएर सेयर बेच्ने प्रवृत्ति) देखिएको छ। यसको सबैभन्दा ठूलो मार निर्जीवन बीमा समूहलाई परेको छ, जुन सूचक ५.०३ प्रतिशत अर्थात् ४९० अंकले ओरालो लागेको छ।
- Advertisement -
बाढीका कारण एक दर्जनभन्दा बढी जलविद्युत् आयोजनाहरूमा क्षति पुगेको प्रारम्भिक अनुमान छ। यी आयोजनाहरूको भौतिक सम्पत्तिको बीमा हुने भएकाले निर्जीवन बीमा कम्पनीहरूले ठूलो रकम क्षतिपूर्तिबापत तिर्नुपर्ने हुन्छ। यही वित्तीय जोखिमलाई अनुमान गर्दै लगानीकर्ताहरूले बीमा र हाइड्रोपावर क्षेत्रका सेयरहरू धमाधम बिक्री गर्दा बजारमा पहिरो गएको हो।
प्राकृतिक प्रकोपको समयमा बजारमा अत्यधिक अस्थिरता आउने गर्छ। यस्तो बेला हल्ला र डरको भरमा निर्णय लिनु घातक हुन सक्छ। विज्ञहरूका अनुसार, कम्पनीहरूको पुनर्बीमा (Reinsurance) व्यवस्था कस्तो छ र वास्तविक क्षति कति भएको हो भन्ने आधिकारिक विवरण हेरेर मात्र सुरक्षित लगानी रणनीति बनाउनु उपयुक्त हुन्छ।
प्रतिक्रिया दिनुहोस्