लगातार छैटौँ दिनको वृद्धिपछि सेयर बजारमा करेक्सन, साढे ५ अर्ब नजिकको कारोबार

काठमाडौँ – लामो समयदेखि बढिरहेको सेयर बजारमा बुधबार भने ब्रेक लागेको छ। लगातार छ दिनको उत्साहजनक वृद्धि पछि नेपाल स्टक एक्सचेन्ज (नेप्से) परिसूचक १३.९५ अंकले ओरालो लाग्दै २,७१२.५४ विन्दुमा सीमित भएको हो।

बजार खुलेदेखि नै बिक्री चाप बढेका कारण सूचकसँगै कारोबार रकममा पनि केही गिरावट आएको छ। यस दिन कुल ३४६ कम्पनीको १ करोड १३ लाखभन्दा बढी कित्ता सेयर किनबेच हुँदा ५ अर्ब १८ करोड ७४ लाख रुपैयाँ बराबरको कारोबार भएको छ। लगानीकर्ताहरूले नाफा सुरक्षित गर्न (प्रफिट बुकिङ) तर्फ जोड दिँदा बजारमा १९३ कम्पनीको सेयर मूल्य घटेको छ भने ७७ कम्पनीको मूल्य मात्र बढेको छ।

- Advertisement -

यस गिरावटमा पनि फाइनान्स र उत्पादनमूलक उपसूचकहरू सामान्य हरियाली रहन सफल भए। बाँकी ११ वटा उपसमूहहरूमा भने गिरावट देखिएको छ, जसमा व्यापार उपसमूह सबैभन्दा धेरै २.६० प्रतिशतले ओरालो लागेको छ।

आजको बजारमा रिडी पावर कम्पनीको सर्वाधिक ४२ करोड ३० लाख रुपैयाँको सेयर कारोबार भएको छ भने नयाँ सूचीकृत एभरेष्ट कलर लिमिटेडको सेयर मूल्य करिब १५ प्रतिशतले बढेर सकारात्मक सर्किट लागेको छ। विश्लेषकहरूका अनुसार बजार लगातार बढेकाले आजको गिरावटलाई स्वाभाविक र स्वस्थ करेक्सनका रूपमा लिन सकिन्छ।