एनपीएलको पहिलो क्वालिफायरमा आज सुदूरपश्चिम र विराटनगर भिड्दै, को होला दोस्रो सिजनको पहिलो फाइनालिस्ट ?

काठमाडौँ – नेपाल प्रिमियर लिग (एनपीएल) को आज पहिलो क्वालिफायर खेल हुदैछ । पहिलो क्वालिफायरको खेल लिग चरणमा शिर्ष दुई स्थानमा रहेका सुदूरपश्चिम रोयल्स र विराटनगर किंग्सवीच दिउसो ४ बजेदेखि शुरु हुदैछ ।

लिग चरणमा सुदूरपश्चिमले ७ खेलमा ६ जित हासिल गरेको थियो भने एक खेल विराटनगरसँग हारेको थियो । त्यस्तै विराटनगरले भने आफ्ना ७ खेलमा ५ खेलमा जित हासिल गरेको थियो र दुई खेलमा हार बेहोरेको थियो । विराटनगर लुम्बिनी लायन्स र चितवन राइनोजसँग पराजित भएको थियो ।

- Advertisement -

यस खेलको विजेता सिधै फाइनलमा पुग्ने छ भने पराजित हुने टिमले दोस्रो क्वालिफायर खेल्ने अवसर पाउने छ । सुदूरपश्चिम रोयल्स पहिलो सिजनको उपविजेता टिम हो भने पहिलो सिजनमा लिग चरणबाट बाहिरिएको विराटनगरले यस सिजनमा दोस्रो स्थानमा रहदै पहिलो क्वालिफायर खेल्न लागि रहेको छ ।

दिपेन्द्रसिंह ऐरी कप्तान रहेको सुदूरपश्चिम अभिनाश बोहरा, आरिफ शेख, विनोद भण्डारी सहितका राष्ट्रिय खेलाडी र स्कट कुगेइलिन, हर्मीत सिंह जस्ता विदेशी खेलाडीसहित यस सिजनको एनपीएल खेलिरहेको छ । सुदूरपश्चिमबाट खेलिरहेका जोश ब्राउन र क्रिस लीन अब बाँकी खेलमा उपलब्ध हुने छैनन् भने सुदूरपश्चिमले बाँकी खेलका लागि भारतीय खेलाडी शेल्डन फिलिप्स ज्याक्सन र पाकिस्तान खेलाडी मुखतार अहमदलाई भित्र्याएको छ ।

त्यस्तै सन्दीप लामिछानेको कप्तानीमा रहेको विराटनगरमा लोकेश बम, प्रतिश जिसी जस्ता राष्ट्रिय खेलाडी छन् भने जर्ज मुन्सी, मार्टिन गप्टिल, शुभम सुबहस रंजने, मर्चेन्ट डी लंगे, फाफ डु प्लेसिस, साम्युएल डाली हीजलेट जस्ता विदेशी खेलाडी रहेका छन् ।