अर्थ र गृह मन्त्रीको सहभागितामा शिक्षकसँग भएको वार्ता निष्कर्षविहिन ! आज पुन: वार्ता हुने

काठमाडौं – विद्यालय शिक्षा ऐन माग गर्दै आन्दोलनरत नेपाल शिक्षक महासंघ र सरकारबीचको वार्ता फेरि बिना निष्कर्ष टुंगिएको छ । वार्ता बिना निष्कर्ष टुंगिए पनि सरकारी र शिक्षक पक्ष दुवैले छलफल सकारात्मक भएको प्रतिक्रिया भने दिन छोडेका छैनन्।

शिक्षा, विज्ञान तथा प्रविधिमन्त्री रघुजी पन्तले शिक्षक महासङ्घसँग जारी वार्ता सकारात्मक दिशामा अघि बढेको बताए। शिक्षकसँगको वार्ता सम्भव भएसम्म छिटो टुङ्गो लगाउन लागिएको बताउँदै उनले मङ्गलबार रातिको वार्तापछि मन्त्रालयमै सञ्चारकर्मीलाई छलफल सकारात्मक भएको जानकारी दिएका हुन्।

- Advertisement -

वार्तामा शिक्षक पनि सकारात्मक रुपमा प्रस्तुत भएको उनले प्रष्ट पारे । शिक्षामन्त्री रघुजी पन्त र महासङ्घका पदाधिकारीबीचको वार्ता मङ्गलबार राति ८ बजेदेखि साढे १० बजेसम्म चलेको थियो । वार्तामा उपप्रधान एवं अर्थमन्त्री विष्णु पौडेल र गृहमन्त्री रमेश लेखक पनि सहभागी थिए।

महासङ्घका तर्फबाट अध्यक्ष लक्ष्मीकिशोर सुवेदी नेतृत्वमा शिक्षकको टोली वार्तामा सहभागी भएको थियो । सरकार र आन्दोलनरत शिक्षक महासङ्घबीच सोमबार भएको वार्ता सकारात्मक रुपमा अघि बढेकामा मंगलबार पुनः वार्ता भएको हो । वार्ताका क्रममा शिक्षक महासंघले सरकार समक्ष ९ बुँदे प्रस्ताव पेश गरेको छ । उक्त प्रस्ताव मन्त्रिपरिषद्‌बाट पास भएमा शिक्षक महासंघले आन्दोलनको शैली फेर्ने बताएको छ ।

अहिले बिहान बिहान महासंघको बैठक बसेर आन्दोलनको मोडालिटीबारे निर्णय गर्ने आन्दोलनरत शिक्षकहरूको तयारी छ। यी हुन् ९ बुँदेमा रहेका विषय :

-विद्यालय कर्मचारी र ईसीडीका शिक्षकको तलब
-सामाजिक सुरक्षा कोष
-दुर्गम भत्ता
-ग्रेड समायोजन
-मर्यादा क्रम
-अस्पतालमा शिक्षकको उपचारमा छुटको व्यवस्था
-निमावि प्रथम र मावि द्वितीयबीच तलबमा समानता बनाउने ।
-राहत शिक्षक लगायत ।