काठमाडौं – आफ्नै घरेलु मैदानमा उपाधि जित्ने लक्ष्य सहित मैदान उत्रिने तयारीमा रहेको नेपालले साफ महिला च्याम्पियनसिप २०२४ को आफ्नो पहिलो खेलमा आज भुटानसँग खेल्दैछ।
दशरथ रंगशालामा साँझ साढे ५ बजे खेल सुरु हुनेछ। घरेलु मैदानमा नेपाल जितसहित प्रतियोगिताको सुरुवात गर्ने लक्ष्यमा छ।तुलनात्मकरुपमा साविक उपविजेता नेपाल, भुटानभन्दा बलियो छ। तर पछिल्लाे चरणमा भुटानले पनि फुटबलमा राम्राे मेहनत र लगानी गरेकाे छ ।
- Advertisement -
यस प्रतियोगिताका लागि नेपाली टोलीले ३ साता अभ्यास गरेको थियो। घरेलु मैदानमा राजेन्द्र तामाङको टोली च्याम्पियन बन्ने लक्ष्यमा हुने छ। तर नेपाल अन्तर्राष्ट्रिय एक्सपोजर बिनै प्रतियोगितामा सहभागिता जनाउँदै छ।
चयाम्पियनसिपमा हालसम्म प्रभावशाली प्रदर्शन गर्न नसकेको भुटानले यस पटक भने लामो तयारी गरेको छ। पहिलो पटक २०२२ मा सेमिफाइनलसम्म पुगेको भुटानले घरेलु महिला फुटबललाई विशेष प्राथमिकतामा राखेको छ।
पछिल्ला ६ मध्ये पाँच संस्करणको उपविजेता नेपालले च्याम्यिनसिप भने जित्न सकेको छैन। प्रतियोगितामा सबैभन्दा कमजोर प्रदर्शन गर्दै आएको भुटानले गत संस्करण पहिलो जित हात पार्दै सेमिफाइनलसम्म पुगेको थियो। आजको खेल स्टार फरवार्ड सावित्रा भण्डारीले गुमाउने भएकी छिन्।
आजै हुने पहिलो खेलमा श्रीलंका र माल्दिभ्सले प्रतिस्पर्धा गर्ने छन्। यो खेल दिउँसो साढे १ बजे सुरु हुने छ। हिजो भएको उद्घाटन खेलमा भारतले पाकिस्तानलाई ५–२ गोल पराजित गरेको थियो।
प्रतिक्रिया दिनुहोस्