काठमाडौं – नेपाल आइसीसी यू–१९ विश्वकप क्रिकेटको सुपर सिक्समा पुगेपछि खेलप्रेमी उत्साहित छन् । समूह चरणमा एक खेल जितेर सुपर सिक्समा पुगे पनि नेपालको अबको यात्रा भने निकै कठिन देखिएको छ ।
नेपाल सेमिफाइनलमा पुग्न सम्भव छ त ? अहिले क्रिकेटप्रेमीको मनमा यो प्रश्न उब्जिरहेको छ । नेपालले सुपर सिक्समा दुई प्रतिद्वन्द्वी भारत र बंगलादेशसँग प्रतिस्पर्धा गर्दैछ । आइसीसीले सुपर सिक्सको फर्म्याट यस्तो बनाएको छ कि नेपाललाई सेमिफाइनल पुग्न फलामको च्यूरा चपाए जस्तो गाह्रो छ ।
भारत र बंगलादेशलाई हराएर मात्रै पनि नेपाल सुपर सिक्समा पुग्न सक्दैन, अन्य टोलीको नतिजामा पनि निर्भर रहनु पर्नेछ । सुपर सिक्समा नेपालले बुधबार बंगलादेश र शुक्रबार भारतसँग प्रतिस्पर्धा गर्नेछ ।
सुपर सिक्सका लागि दुईवटा समूह बनाइएको छ । नेपाल रहेको समूह- १ मा भारत, पाकिस्तान, न्यूजिल्यान्ड, बंगलादेश र आयरल्यान्ड छन् । समूह- २ मा अष्ट्रेलिया, श्रीलंका, दक्षिण अफ्रिका, इंल्यान्ड, जिम्बाब्वे, र वेस्ट इन्डिज छन्। समूह चरणमा अहिले भारत र अमेरिका तथा अस्ट्रेलिया र श्रीलंकाबीच प्रतिस्पर्धा भइरहेको छ । तर, भारत र अमेरिकाबीचको खेलको नतिजाले खासै प्रभाव पर्ने देखिदैन ।
सुपर सिक्समा रहेका सबै टोलीबीच एक आपसमा प्रतिस्पर्धा भने हुनेछैन । बरु समूह चरणमा प्रतिस्पर्धा नगरेका दुई टोलीसँग मात्रै हरेक टिमले खेल्नु पर्नेछ । अर्को महत्त्वपूर्ण कुरा समूह चरणमा पाएको अंकबाट समेत सुपर सिक्समा फाइदा पुग्नेछ ।
समूह चरणमा बंगलादेश र आयरल्यान्डलाई हराएको भारत तथा न्युजिल्यान्ड र नेपाललाई हराएको पाकिस्तान समान ४-४ अंकसहित सुपर सिक्समा पुगेका छन् ।
यसमा सुपर सिक्समा नपुगेको टोलीलाई हराउँदा पाएको समूहको अंक भने जोडिएको छैन । जसका आधारमा न्युजिल्यान्ड र बंगलादेशको समान २-२ अंक छ भने नेपाल र आयरल्यान्ड अंकविहीन छन् ।
एकै समूहबाट सुपर सिक्समा पुग्ने टोलीबीच प्रतिस्पर्धा नहुने र समूह चरणकै नतिजाका आधारमा अंक जोडिने भएकाले नेपाल समस्यामा परेको हो । समूह चरणमा नेपालले अफगानिस्तानलाई हराएको थियो । तर, अफगानिस्तान समूह चरणमै रोकिएकाले नेपाल सुपर सिक्समा अंकविहीन भएको हो ।
कसरी पुग्न सक्छ त नेपाल सेमिफाइनल ?
सेमिफाइनल पुग्न नेपालले सुपर सिक्समा भारत र बंगलादेशलाई त हराउनै पर्नेछ । तर, यतिले मात्रै पुग्नेछैन । समान ४ अंक रहेका भारत र पाकिस्तानमध्ये कम्तीमा एक टिमले नेपालको सेमिफाइनल सम्भावना जिवित राख्न दुवै खेल हार्नै पर्नेछ ।
एक-एक जितले मात्र पनि नेपालको सम्भावना समाप्त हुनेछ । भारतले नेपालबाहेक न्युजिल्यान्डसँग तथा पाकिस्तानले आयरल्यान्ड र बंगलादेशसँग खेल्नेछ । न्युजिल्यान्डको थप खेल आयरल्यान्डसँग हुनेछ ।
नेपालको सम्भावना कायम रहन न्युजिल्यान्ड र बंगलादेशले दुईमध्ये एक-एक खेल हार्नु पर्नेछ । नेपालसँगको खेल गुमाएर बंगलादेशले पाकिस्तानलाई हराए समूह- १ बाट सेमिफाइनलमा पुग्ने दुई टोलीको छिनोफानो रोचक बन्नेछ । तर, भारत र पाकिस्तानले एक-एक तथा न्युजिल्याण्ड र बंगलादेशले दुवै खेल जिते नेपाल आफ्ना दुवै खेल जितेर पनि सेमिफाइनल पुग्न सक्ने छैन ।
नेपाल र आयरल्यान्डलाई दुवै खेल जित्दै अन्य खेलको नतिजामा समेत भर पर्नु पर्नै बाध्यता रहे पनि भारत र पाकिस्तान सहज अवस्थामा छन् । न्युजिल्यान्ड र बंगलादेशलाई सेमिफाइनल पुग्न भने अंक तालिकामा आफुहरु भन्दा माथि रहेका भारत र पाकिस्तानले कम्तीमा एक-एक खेल हार्नु पर्नेंछ । अनि दुवैले आफ्ना दुवै खेल जित्नु पर्नेछ ।
प्रतिक्रिया दिनुहोस्