काठमाडौं – दूरसञ्चार सेवा प्रदायक कम्पनी एनसेलको शेयर खरिदबिक्री प्रकरणमा सरकारलाई झुक्क्याउन खोजेको छ ।
नेपाल दूरसञ्चार प्राधिकरणले स्वीकृति विना शेयर खरिदबिक्री नगर्न निर्देशन सहितको पत्र एनसेललाई पठाएपछि अर्बाैंको चलखेल पर्दाफास भएको हो ।
दूरसञ्चार नियामावली २०५४ को १५ (ट) अनुसार ५ प्रतिशतभन्दा बढी शेयर खरिद वा बिक्री गर्नुअघि प्राधिकरणको स्वीकृति लिनुपर्छ । एनसेलमा रहेको ८० प्रतिशत शेयर बिक्री गर्ने मलेसियाको आजियाटा समूहको निर्णय सार्वजनिक भएको छ ।
शेयर खरिद गर्न लागेका यी व्यवसायी प्रधानमन्त्री पुष्पकमल दाहाल ‘प्रचण्ड’ निकट मानिन्छन् । शेयर खरिदबिक्रीका लागि सम्झौता समेत भइसकेको छ । तर नियामक निकाय प्राधिकरणलाई जानकारी दिइएको छैन ।सतिशलाल आचार्यको स्पेक्ट्रलाइट युके लिमिटेडले एनसेलको ८० प्रतिशत सेयर किनेको हो। आचार्यको यसअघि नै २० प्रतिशत सेयर एनसेलमा रहेको छ ।
स्रोतले दिएको जानकारीअनुसार यो डिलको पछाडी प्रधानमन्त्री पुष्पकमल दाहाल निकट व्यवसायी उपेन्द्र महतो र चन्द्र ढकाल रहेका छन् । उनिहरुकै डिजाइनमा आचार्यले नयां कम्पनी खोलेर एनसेलको ८० प्रतिशत सेयर किनेका हुन् ।
एनसेलले लगभग वार्षिक ३५०० करोड रुपैयाँ कमाउने गर्छ । तर शेयर खरिदबिक्री ६५० करोड गर्ने गरी सम्झौता भई सरकारलाई हानी पुर्याउन खोजिएको बताइन्छ ।
२०६१ भदौ १६ गते अनुमतिपत्र लिएको एनसेलको लाइसेन्स अवधि २५ वर्ष रहेको छ, जुन आगामी २०८६ भदौमा सकिँदैछ । दूरसञ्चार ऐन २०५३ अनुसार लाइसेन्स अवधि समाप्त भएसँगै एनसेल नेपाल सरकारको स्वामित्वमा आउने प्रावधान छ ।
स्वीकृति विना ‘चोर बाटो’बाट शेयर खरिदबिक्री गरेर एनसेललाई सरकारी स्वामित्वमा आउनबाट रोक्ने चलखेल भइरहेको स्रोतको दाबी छ । शेयर खरिदबिक्री रोक्न उच्च अदालत पाटनमा दायर रिटमाथि सुनुवाइ गर्दै अदालतले छलफलका लागि दुवै पक्षलाई मंसिर २५ गते बोलाएको छ ।
प्रतिक्रिया दिनुहोस्