६० केजी सुन तस्करी प्रकरण: गठन हुने भयो उच्च स्तरीय छानबिन समिति, आजबाट सदन खुल्ने

६० केजी सुन तस्करी प्रकरणमा उच्चस्तरीय छानबिन समिति बनाउन दलहरुबीच सहमति भएको छ । सोमबार साँझ सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको संसदमा प्रतिनिधित्व गर्ने राष्ट्रिय दलका शीर्ष तहको बैठकमा छानबिन समिति बनाउन मोटामोटी सहमति जुटेको हो ।

बैठकमा सत्तारुढ दल उच्चस्तरीय छानबिन समिति बनाउने विषयमा सहमत भएको राष्ट्रिय स्वतन्त्र पार्टीका सभापति रवि लामिछाने बताए । यो विषयमा होमवर्क गर्नुपर्ने भएकाले सुवास नेम्वाङ, हितराज पाण्डे र रमेश लेखकले ड्राफ्ट तयार गर्नेगरी भोलि बिहान ११ बजेसम्मको समय दिइएको छ । त्यसलाई अन्तिम रुप दिएर २ बजे शीर्ष तहको बैठक बस्ने सहमति भएको छ ।

- Advertisement -

कांग्रेस नेता रमेश लेखकले बैठकमा सकारात्मक छलफल भएको बताए । उनले सबै विकल्प र सम्भावनाहरुमा छलफल भएको जानकारी दिए । उनले मंगलबारबाट सदन नियमित चल्ने समेत जानकारी दिए ।