निहारिकाले शिवराजविरुद्ध दिएको मुद्दा फिर्ता लिने सहमति

काठमाडौं– आफूमाथि बलात्कार भएको तर जिल्ला अदालतले सफाइ दिएको भन्दै उच्च अदालतमा पुनरावेदनको मुद्दा लडिरहेकी निहारिका राजपूतले अन्ततः शिवराज श्रेष्ठलाई आफ्नो पति स्विकार गरेकि छिन् । सोमबार धनुषा जिल्ला अदालतमा शिवराजसँग आफू मिलेर बस्ने भन्दै निहारिकाले मिलापत्र गरेकी हुन् । आफूलाई कुमारी आमा भनेर चिनाउने सोनाली कुमारी सिंह अर्थात् निहारिका राजपूतले सुरुमा धनुषा जिल्ला अदालतमा प्रेमी शिवराज श्रेष्ठविरुद्ध बलात्कारको जाहेरी दिएकी थिइन् । तर धनुषा जिल्ला अदालतले शिवराज र सोनालीबीच प्रेमसम्बन्ध रहेको र प्रेमसम्बन्धमा समयमा भएको शारीरिक सम्बन्धलाई जबरजस्ती करणी भनी मान्न नमिल्ने भन्दै शिवराजलाई सफाइ दिएको थियो ।
धनुषा जिल्ला अदालतले शिवराजलाई बलात्कारको कसुरमा सफाइ दिएपछि निहारिकाले उच्च अदालत जनकपुरमा पुनरावेदनको मुद्दा दर्ता गराएकी थिइन् । सोही समयमा उनले आन्दोलनसमेत गरेर बलात्कारीलाई सजाय दिन माग गरेकी थिइन् ।
तर गत माघ १५ गते आइतबार मात्रै निहारिकाले धनुषा जिल्ला अदालतमा शिवराज श्रेष्ठविरुद्ध अंश दाबी गर्दै मुद्दा दर्ता गराएकी थिइन् । निहारिकाको निवेदनमा आफूहरू २०७५ सालदेखि पति पत्नी भई बसेको र आफूहरुबीचको सम्बन्धबाट एउटा बालकको समेत जन्म भएको उल्लेख गरेकी छिन् । निहारिकाको निवेदनमा ‘पति शिवराज श्रेष्ठले खान लाउन नदिएको, मदिरा सेवन गरी कुटपिट गर्ने गरेको र आफ्नो हेरचाह नगरेको’ आरोप लगाएकी थिइन् ।
त्यसको भोलिपल्ट अर्थात् माघ १६ गते नै प्रतिवादी शिवराज श्रेष्ठले प्रतिउत्तर दिँदै आफूहरुबीच प्रेम सम्बन्ध रहेको, विवाह गरी बसेको र आफूहरुबीचको सम्बन्धबाट एक बालकको जन्मसमेत भएको स्वीकार गर्दै आफूले कुटपीट नगरेको र वादीले अंश लिन चाहेमा दिने भनेका छन् ।
माघ १६ गते नै शिवराज र निहारिकाबीच धनुषा जिल्ला अदालतमा मिलापत्र भई अब ‘श्रीमान्–श्रीमती’ मिलेर बस्ने र मुद्दा फिर्ता लिने मिलापत्र भएको छ । धनुषा जिल्ला अदालतमा श्रीमान् र श्रीमती मिलेर बस्ने मिलापत्र भएसँगै अब निहारिकाले उच्च अदालत जनकपुरमा दिएको बलात्कार मुद्दाको पुनरावेदनको निवेदन पनि प्रभावित हुने भएको छ । निहारिका आफैँले अदालतमा निवेदन दिई आफूहरू मिलेर बस्न लागेको ब्यहोरा उल्लेख गर्न लागेकी छिन् ।