प्रहरीमा ३० वर्षे सेवा अवधि हटाएर उमेर हद मात्रै लागु गर्ने प्रस्तावमा अर्थ मन्त्रालयको सहमति

काठमाडौं–
गृह मन्त्रालयले नेपाल प्रहरीमा ३० वर्षे सेवा अवधि हटाउने अर्थ मन्त्रालयमा पठाएको प्रस्तावमा सहमति भएको छ । ३० वर्षे सेवा अवधि हटाउने प्रस्तावमा अर्थ मन्त्रालयले एक वर्षपछि मात्र लागु हुने गरी सहमति प्रदान गरेको हो । प्रहरी महानिरीक्षक (आईजीपी) अहिले ३ वटा अवस्था पुरा गरेपछि अवकाशमा जाने र ५८ वर्षको उमेर हद र आईजीपी भएपछिको चार वर्ष कार्यकाल पुरा गर्नु पर्ने प्रस्तावलाई अर्थ मन्त्रालयले सहमति दिएको जानकारी दिएको छ । तर, सरकारले अहिले ३० वर्षे सेवा अवधि हटाएर उमेर हद मात्रै लागु गर्ने तयारी गरिरहेको बताएइएको छ । अर्थबाट सहमति आएको प्रस्ताव अनुसार जागिर अवधि ३० वर्ष पुरा भए पनि ५८ वर्ष पुरा नहुँदासम्म आईजीपी अवकाशमा लिन पाउँदैनन् ।
गृह मन्त्रालयले प्रहरी नियमावली–२०१२ लाई संशोधन गरेर सेवा अवधि हटाउन प्रस्ताव गरेको छ । सो प्रस्ताव अनुसार प्रहरी अतिरिक्त महानिरीक्षक (एआईजी)को उमेर हद ५७ वर्ष बनाउन प्रस्ताव गरिएको हो । अहिले प्रहरी अतिरिक्त महानिरीक्षकको उमेर हद ५६ वर्ष रहेको छ ।
अर्थ मन्त्रालयबाट सो सर्तसहित पास भएको प्रस्ताव गृह मन्त्रालयमा गएको प्रस्ताव कानुन मन्त्रालय हुँदै मन्त्रिपरिषद्मा पेस हुने छ ।
मन्त्रिपरिषद्बाट अध्यादेश ल्याएर सेवा अवधि हटाउने तयारी भैरहेको छ ।
अध्यादेश मार्फत प्रहरी ऐन–०१२ लाई संशोधन गरेर प्रहरी नियमावली–०७१ को नियम १२७ लाई ऐनमा समावेश गर्ने तयारी गरेको छ । गृहमन्त्री बालकृष्ण खाँण भने प्रहरीको ३० वर्षे सेवा अवधि हटाउने पक्षमा नरहेको स्रोतले बताएको छ । गृह मन्त्रीले प्रधानमन्त्री शेर बहादुर देउवाको ठाडो आदेशका कारण हस्ताक्षर गर्न बाध्य भएको बताइएको छ ।