काठमाडौँ – रुपन्देहीको तिलोत्तमा नगरपालिकाका कर्मचारी ईश्वरी भण्डारीमाथि कुटपिट भएको छ।
नगरपालिकाको अमिन पदमा कार्यरत भण्डारीमाथि आइतबार दिउँसो तिलोत्तमा वडा नं. ७ निवासी खिमानन्द काफ्लेले कार्यकक्षभित्रै हातपात गरेका हुन् ।
- Advertisement -
लालपुर्जामा पाँच धुर मात्रै जग्गा भए पनि काफ्लेले ६ धुर जग्गा उपभोग गर्दै आएका थिए।
आफ्नो जग्गा थोरै भएकोले लालपुर्जा बाहिरको जग्गामा समेत घर बनाउन अनुमति मागेका काफ्लेले लालपुर्जा बाहिरको जग्गामा घर बनाउने अनुमति दिन नमिल्ने बताएपछि भण्डारीमाथि हातपात गरेका थिए।
नेपाल निजामती कर्मचारी सङ्गठन रुपन्देहीले राज्यको नियम कानुन भित्र रहेर काम गर्ने कर्मचारीमाथि कार्यकक्ष भित्रै कुटपिट हुनु निन्दनीय भएको भन्दै उक्त घटनाको भ्रत्सर्ना गरेको छ।
घटनापछि सङ्गठनले विज्ञप्ति जारी गर्दै कर्मचारीमाथि हातपात गर्ने काफ्लेलाई कारबाही गर्न र कर्मचारीको सुरक्षाको माग गरेको छ।
सङ्गठनका जिल्ला अध्यक्ष प्रेमप्रसाद खनाल र सचिव जीवन पौडेलले विज्ञप्ति जारी गर्दै गैरकानुनी काम गर्न नमानेको भन्दै राष्ट्रसेवक कर्मचारीहरू कार्यस्थलमै कुटिनु दुर्भाग्यपूर्ण भएको बताएका छन्।
उनीहरूले कर्मचारीलाई कार्यस्थलमा सुरक्षाको प्रत्याभूति गर्दै आपराधिक घटनामा संलग्न व्यक्तिमाथि कारवाहीको माग गरेका छन्।
सङ्गठनले नगरपालिका र प्रहरी प्रशासनले अपराधिक कार्यमा संलग्न व्यक्तिलाई कारवाहीको दायरामा ल्याउन र कर्मचारीले उच्च मनोवलका साथ काम गर्ने वातावरण मिलाउन माग गरेको छ।
भण्डारीमाथि भएको हातपातको घटनाप्रति तिलोत्तमा नगरपालिका अन्तर्गतका वडा कार्यालय र स्वास्थ्य संस्थामा कार्यरत कर्मचारीले पनि आपत्ति जनाएका छन्। उनीहरूले घटनामा संलग्न व्यक्तिलाई तत्काल कारवाहीको दायरामा ल्याउन माग गरेका छन्।
तिलोत्तमा नगरपालिकाका प्रमुख रामकृष्ण खाँणले कार्यालयभित्रै कर्मचारीमाथि हातपात हुनु निन्दनीय भएको भन्दै दोषीमाथि कानुनी कारवाहीको माग गरेका छन्।
प्रतिक्रिया दिनुहोस्