बीमा समिति कोभिडको दाबी बीमा रकम भुक्तानी गर्न अर्थ मन्त्रालयको निर्देशनको पखाईमा

काठमाडौं– बीमा समितिले कोभिड दावी भुक्तानी वितरण गर्ने सम्बन्धमा अनुमति मागसहितको पत्र तिहार अघिनै पठाएको भए पनि कुनै निर्देशन अर्थ मन्त्रालयले पठाएको छैन । कोभिड रकम वितरण गर्नका लागि अर्थ मन्त्रालयमा निर्देशन गरी पाउँ भनेर पत्र पठाएको समितिका प्रवक्ता राजुरमण पौडेले बताएका छन् ।
समितिले तिहार अघि नै मन्त्रालयलाई पत्र पठाएर कोभिड दाबी भुक्तानी वितरण गर्ने अनुमति मागे पनि केहि जानकारी प्राप्त नभएको पौडेलले बताए ।
समितिले जारी गरेको कोरोना बीमा मापदण्ड, २०७७ अनुसार रकम वितरण गर्न नमिल्ने भएपनि नयाँ व्यवस्था गरेर भए पनि दावीको भुक्तानी गर्ने मनस्थितिमा बीमा समिति रहेको छ । अर्थको निर्देशन आएलगत्तै रकम वितरण सुरु गर्न सबै तयारी भैसकेको समितिले जनाएको छ ।
गत भदौमा सरकारले कोभिड बीमा बापतको दावी भुक्तानी तिर्नको लागि एक अर्ब रुपैयाँ निकासा गरेको थियो । सरकारले करिब १० अर्ब रुपैयाँ तिर्न बाँकी थियो। रकम अपुग भएपछि बीमा समिति, बीमा कम्पनी र पुनर्बीमा कम्पनीबाट थप रकम संकलन गरेर कोभिडको दावी भुक्तानी तिर्न लागेको जानकारी दिएको छ ।
पहिले कोभिडको पिसिआर रिपोर्ट पेस गरेको मिति अनुसार बीमितलाई वितरण गर्ने योजना रहेको पौडेलले बताए । सर्वसाधारणलाई पहिले प्राथमिकता दिई दावी भुक्तानी फर्छ्यौट गर्ने निर्णय भएका कारण संघ, संस्थामा कार्यरत कर्मचारीहरुले यस पटक भुक्तानी गर्ने या नगर्ने एकिन नभएको उनले बताए ।