सरकारले खानेतेलको कच्चापदार्थ लगायतका सामानमा घटायो कर, उपभोक्ता मूल्य घट्ला त?

काठमाडौं– सरकारले खानेतेलको कच्चापदार्थ, पाम तेल लगातका सामानमा लाग्ने करका दरहरु घटाएको छ । मन्त्रिपरिषद बैठकले चालु आर्थिक वर्षको लागि बजेट मार्फत तय गरिएका करका दरहरु घटाएको हो । अर्थमन्त्रालयले राजपत्रमा सूचना प्रकाशित गरी करका दरहरु नयाँ तय गरिएको जानकारी दिएको छ । सरकारले करका दर पुननिर्धारण गर्न एउटा समिति गठन गरेको थियो र उक्त समितिको सिफारिसका आधारमा करका दरहरु परिवर्तन गरिएको हो ।

सरकारले वनस्पति घ्यू तेल उद्योगहरुले औद्योगिक कच्चा पदार्थको रुपमा प्रयोग गर्ने भन्सार उपशीर्षक १५०७.१०.०० को कच्चा भटमासको तेल, उपशिर्षक १५११.१०.०० को कच्चा पाम तेल र उपशीर्षक १५१२.११.०० को कच्चा सूर्यमुखी तेलको आयातमा लाग्ने भन्सार महसुलमा ९० प्रतिशत छुट गरेको छ । यस्तै सूर्यमुखी दाना, भटमास दाना, तोरी दाना, रायो दाना, क्यानोला र सर्स्युको दाना आयातमा समेत ९० प्रतिशत छुट गरेको छ  ।

यस्तै अन्य सामग्रीमा भन्सार उपशीर्षक ७२१३.९१.१० का वस्तुहरु बार, रड, हट रोल्ड सर्कुलर क्रस सेक्सनको भन्सार महसुल १० प्रतिशतबाट घटाएर ५ प्रतिशत कायम गर्ने निर्णय गरेको छ । साथै अन्तशुल्क दरबन्दीको शिर्षक ७२.०७ को मालवस्तु (फलाम ब्लेडलगायत) आयातमा लाग्ने अन्तशुल्क ३५ रुपैयाँको सट्टा २५ सय रुपैयाँ राखिएको छ ।

सेनिटरी प्याड उत्पादन उद्योगले उपशिर्षक ३९२०.४९.९० को कच्चा पदार्थ पिई फिल्म स्यानिटरी प्याड र उपशीर्षक ३९२१.१९.९० को कच्चा पदार्थ पर्फारेड पीई फिल्म आयात गर्दा अन्तःशुल्क नलाग्ने व्यवस्था गरिएको छ ।

उद्योग विभागको सिफारिसमा अप्टिकल फाइबर केवल उत्पादन गर्ने उद्योगले कच्चा पदार्थको रुपमा आयात गर्ने स्प्रिङ स्टिल वायरमा भन्सार महसुल १० प्रतिशत लाग्ने र ट्वीस्टेड स्ट्रण्ड वायरमा भने भन्सार महसुल १५ प्रतिशत लाग्ने व्यवस्था गरिएको छ ।

कच्चापदार्थको भन्सार र अन्तशुल्कमा छुट दिएसँगै छुट पाएका सामाग्रीको बजार मूल्य घट्नुपर्ने हुन्छ । के खाद्यतेल लगायतका सामग्रीको बजार मूल्य घट्ला त?

 खाद्य तेलको कच्चापदार्थ यस अघिनै नजिकिदो चाडपर्वलाई लक्षित गरि धेरै उद्योगले भण्डारण गरिसकिएकोले खाद्यतेलको बजारभाउ तुरुन्तै नघट्ने एक व्यवशायी बताउछन ।

तर सरकारी निकायका जिम्मेवारहरू भने तुरुन्तै मूल्य घट्ने बताउछन ।  के सरकारले बजार अनुगमन गरेर मूल्य घटाई उपभोक्तालाई राहत दिन सक्ला त ? प्रश्न खडा भएको छ ।

राजपत्र :

https://drive.google.com/file/d/10yjkQ9GFeN8tC3Ouxa-jriq3RG-5l1PG/view