काठमाडौँ – रुसको सत्तारुढ दलले युक्रेनका अतिक्रमित क्षेत्रमा नोभेम्बर ४ मा जनमत संग्रह गराउने प्रस्ताव गरेको छ । यस जनमत संग्रहको उद्देश्य युक्रेनमा रुसी सेनाले कब्जामा लिएका क्षेत्रहरू कब्जा गर्नु हो। रसियाले हरेक वर्ष नोभेम्बर ४ लाई राष्ट्रिय एकता दिवसको रुपमा मनाउने भएकाले यो जनमत संग्रह ४ नोभेम्बरमा हुनेछ ।
राष्ट्रपति भ्लादिमिर पुटिनको सत्तारुढ युनाइटेड रसिया पार्टीको वेबसाइटमा जारी गरिएको विज्ञप्तिमा पार्टीका महासचिव एन्ड्रे टुर्चाकले नोभेम्बर ४ मा रुसको राष्ट्रिय एकता दिवसको अवसरमा मतदान गर्नु सही र प्रतीकात्मक हुने बताए।
उनले नोभेम्बर ४ मा हुन लागेको जनमत संग्रह डोनेस्क र लुगान्स्कलगायत रुसले कब्जा गरेको युक्रेनको अन्य धेरै क्षेत्रमा हुने र यसबाट रुसले आफ्नो अखण्डता पुनः प्राप्त गर्ने बताए ।
यो घोषणापछि खेरसन क्षेत्रका रुस समर्थक अधिकारी किरिल स्ट्रोमोसोभले रुसको आधिकारिक समाचार एजेन्सी टासलाई भने कि हामी कुनै पनि निश्चित मितिमा जनमत संग्रह गर्न तयार छौं । हामी अझै पनि जनमत संग्रहका लागि तयार छौं ।
रुसी सेनाले खेरसोन सहित युक्रेनको धेरै दक्षिणी क्षेत्रहरू कब्जा गरेको छ। युक्रेनका यी क्षेत्रहरूमा रुसी सरकारले विगत केही सातादेखि जनमत संग्रह गर्ने विषयमा छलफल गरिरहेको छ। यसअघि सन् २०१४ मा रुसले क्रिमियालाई युक्रेनबाट गाभेको थियो ।
२४ फेब्रुअरीमा युक्रेनमा रुसले आक्रमण गर्नुअघि पनि रुसले यी दुई क्षेत्रलाई स्वतन्त्र घोषणा गरेको थियो । पुटिन सरकारले पनि रुसी राहदानी जारी गरेर यी क्षेत्रका स्थानीय जनतासँग सम्बन्ध मजबुत बनाउन जोड दिइरहेको छ ।
एजेन्सी
प्रतिक्रिया दिनुहोस्